rakul: నితిన్ తో చేసేందుకు రకుల్ రెడీ

కొంతకాలంగా వరుస పరాజయాలతో నితిన్ సతమతమవుతున్నాడు. ఈ సారి తప్పకుండా హిట్ కొట్టాలనే పట్టుదలతో ఆయన వున్నాడు. 'ఛలో' వంటి ప్రేమకథతో హిట్ కొట్టిన వెంకీ కుడుములతో ఒక సినిమా చేయడానికి గ్రీన్ సిగ్నల్ ఇచ్చేశాడు. రష్మిక మందన కథానాయికగా నటించనున్న ఈ సినిమా, వచ్చేనెలలో సెట్స్ పైకి వెళ్లనుంది.

ఈ సినిమాతో పాటు చంద్రశేఖర్ యేలేటితోను ఒక సినిమా చేయడానికి నితిన్ ఓకే చెప్పాడట. ఈ సినిమాలో కథానాయిక పాత్ర కోసం రకుల్ ను సంప్రదించగా, ఆమె గ్రీన్ సిగ్నల్ ఇచ్చేసిందనేది తాజా సమాచారం. చాలా కాలంగా రకుల్ తెలుగులో స్టార్ హీరోలతో మాత్రమే సినిమాలు చేస్తూ వస్తోంది. కొత్త కథానాయికల పోటీ కారణంగా ఇటీవల ఆమె జోరు తగ్గింది. అవకాశాలు లేకపోవడం వల్లనే రకుల్ ఈ సినిమాను అంగీకరించిందనే గుసగుసలు వినిపిస్తున్నాయి. ఈ ప్రాజెక్టుకు సంబంధించిన పూర్తి వివరాలు త్వరలోనే తెలియనున్నాయి.