Uttar Pradesh: నేనేంటో తెలియదా?... మహిళా అధికారిని బెదిరిస్తూ వీడియోకు చిక్కిన యూపీ బీజేపీ నేత!

ఉత్తరప్రదేశ్ లో అధికార దర్పం ఎలా ఉంటుందనడానికి ఇది మరో ఉదాహరణ. అధికార బీజేపీ ఎమ్మెల్యే ఓ మహిళా అధికారిని బెదిరిస్తుండగా తీసిన వీడియో ఇప్పుడు వైరల్ అవుతోంది. బీజేపీ ఎమ్మెల్యే ఉదయభన్‌ చౌదరి, కేరావలి సబ్‌ డివిజనల్‌ మేజిస్ర్టేట్‌ గరీమా సింగ్‌ ఈ వీడియోలో కనిపిస్తున్నారు.

తానో రాజకీయ నేతనని, తన సత్తా ఏంటో చూపిస్తానని ఎమ్మెల్యే అంటుండటం ఈ వీడియోలో వినిపిస్తోంది. "నా అధికారం ఏంటో నీకు తెలియదా" అని చౌదరి కేకలు వేస్తున్నట్టు తెలుస్తోంది. ఆపై గరీమా సింగ్ ను ఓ పనిమనిషిగా సంబోధిస్తూ, దర్పం తన వద్ద ప్రదర్శించాలని అనుకుంటే కుదరదని, నీవు ఓ నౌకరువు మాత్రమేనని అనడం వినిపిస్తోంది. ఇదే సమయంలో అక్కడున్న కొందరు ఆయన్ను వ్యతిరేకిస్తూ 'ఎస్‌డీఎం జిందాబాద్‌' అనడం కూడా వీడియోలో రికార్డయింది.