Hyderabad: మందుకొట్టి పట్టుబడ్డ పలువురు మహిళలు... నానా తంటాలూ పడ్డ పోలీసులు!

హైదరాబాద్ పరిధిలోని బంజారాహిల్స్, జూబ్లీహిల్స్ తదితర ప్రాంతాల్లో శనివారం రాత్రి డ్రంకెన్ డ్రైవ్ నిర్వహించగా, పలువురు మహిళలు మందు కొట్టి వాహనాలు నడుపుతూ పోలీసులకు పట్టుబడ్డారు. మొత్తం 6 ప్రాంతాల్లో కాపుకాసిన పోలీసులు, ఆ మార్గంలో వస్తున్న వాహనదారులందరినీ తనిఖీలు చేశారు. గత రాత్రి మొత్తం 108 మందిపై కేసులు పెట్టామని, ఇందులో 43 కార్లు, 65 బైకులు ఉన్నాయని అధికారులు తెలిపారు.

పట్టుబడిన వారిలో కొందరు మహిళలు, తొలుత తనిఖీలకు, ఆపై వాహనాలు అప్పగించేందుకు నిరాకరించి పోలీసులకు సహకరించలేదు. తమను వీడియో తీస్తున్న మీడియాపైనా వారు తమ ప్రతాపాన్ని చూపారు. వారిని అదుపు చేసేందుకు పోలీసులు మహిళా పోలీసుల సాయం తీసుకోవాల్సి వచ్చింది. లా అండ్ ఆర్డర్ పోలీసులను పిలిపించిన అధికారులు, వారి వాహనాలన్నీ సీజ్ చేశారు. పట్టుబడిన వారికి కౌన్సెలింగ్ నిర్వహించి, ఆపై కోర్టులో ప్రవేశపెడతామని పోలీసులు తెలిపారు.