Arun Jaitly: చోక్సీ నుంచి రూ. 24 లక్షలు అందుకున్న జైట్లీ కుమార్తె.. నిలదీసిన కాంగ్రెస్!

బ్యాంకులకు వేల కోట్లను ఎగ్గొట్టి విదేశాలకు పారిపోయిన మేహుల్ చోక్సీ నుంచి కేంద్ర ఆర్థిక మంత్రి అరుణ్ జైట్లీ కుమార్తె సొనాలీకి రూ. 24 లక్షలు అందాయనే వార్తలు ఇప్పుడు కలకలం రేపుతున్నాయి. ఈ అంశంపై కాంగ్రెస్ నేత సచిన్ పైలట్ నిలదీశారు. 2017 డిసెంబర్ లో చోక్సీకి చెందిన కంపెనీ గీతాంజలి జెమ్స్ నుంచి ఛాంబర్స్ ఆఫ్ జైట్లీ అండ్ అసోసియేట్స్ ఖాతాకు డబ్బు జమ అయింది. ఈ సంస్థ జైట్లీ కుమార్తె సొనాలీ, అల్లుడు జయేష్ లకు చెందింది.

ఈ క్రమంలో, ఎలాంటి సేవలు అందించని ఈ కంపెనీకి నిధులు ఎందుకిచ్చారని పైలట్ ప్రశ్నించారు. సొమ్ము తీసుకున్న రెండు నెలలకు ఆ డబ్బును తిరిగి గీతాంజలి కంపెనీ ఖాతాలో వేశారు. ఈ అంశంపై వివాదం నెలకొనడంతో డబ్బును వెనక్కి తిరిగిచ్చేశారని... అసలు డబ్బును ఎందుకు తీసుకున్నారని ప్రశ్నించారు. ఇదే విషయంపై రాహుల్ గాంధీ కూడా ట్వీట్ చేశారు. ఇలాంటి వాస్తవాలను మీడియా ప్రచురించకపోవడం దారుణమని అన్నారు.