CM Ramesh: సీఎం రమేశ్ ఇల్లు, కార్యాలయాల్లో కొనసాగుతున్న ఐటీ సోదాలు!

తెలుగుదేశం నేత, పార్లమెంటు సభ్యుడు సీఎం రమేశ్ నివాసం, కార్యాలయాల్లో రెండో రోజు ఐటీ అధికారులు తనిఖీలు చేస్తున్నారు. నిన్న అర్థరాత్రి వరకూ హైదరాబాద్ లోని రమేశ్ నివాసంతో పాటు రిత్విక్ కంపెనీలో సోదాలు కొనసాగాయి. తాజాగా ఈ రోజు ఉదయం అధికారులు మళ్లీ తనిఖీలను ప్రారంభించారు. దాదాపు 50 నుంచి 100 మంది ఐటీ అధికారులు ఉదయాన్నే హైదరాబాద్ లోని సీఎం రమేశ్ నివాసం, మిగిలిన కార్యాలయాలకు చేరుకుని సోదాలు మొదలుపెట్టారు. రిత్విక్‌ సంస్థ నుంచి ఇప్పటివరకూ అధికారులు 8 హార్డ్‌ డిస్క్‌లు, 18 పెన్‌ డ్రైవ్‌లు, 6 ల్యాప్‌టాప్‌లను స్వాధీనం చేసుకున్నారు. ప్రస్తుతం తనిఖీలు కొనసాగుతున్నాయి.