kcr: కేసీఆర్ బయోపిక్‌లో అవకాశం వస్తే వదులుకోను: నవాజుద్దీన్

ప్రస్తుతం సినీ పరిశ్రమలో వరుసగా బయోపిక్‌లు తెరకెక్కుతున్నాయి. ప్రముఖ నటి సావిత్రి జీవితం ఆధారంగా తెరకెక్కిన 'మహానటి' సినిమా మంచి సక్సెస్‌ను అందుకోవడంతో బయోపిక్‌లు ఊపందుకున్నాయి. ఓవైపు ఎన్టీఆర్, మరోవైపు చంద్రబాబు, ఇంకోవైపు వైయస్, కేసీఆర్ ల బయోపిక్‌లు ప్రస్తుతం తెరకెక్కుతున్నాయి.

ఈ క్రమంలో బాలీవుడ్ ప్రముఖ నటుడు నవాజుద్దీన్ సిద్ధిఖీ.. కేసీఆర్ బయోపిక్‌లో నటిస్తున్నారనే వార్తలు ఈ మధ్యకాలంలో వినవస్తున్నాయి. కానీ ఈ బయోపిక్‌కు సంబంధించి తననెవరూ సంప్రదించలేదని నవాజుద్దీన్ తెలిపారు. ప్రస్తుతం నవాజుద్దీన్ ఇండో-పాక్ రచయిత సాదత్ హసన్ మంటో జీవితం ఆధారంగా తెరకెక్కుతున్న ‘మంటో’ చిత్రంలో కీలక పాత్ర పోషిస్తున్నారు. ఇప్పటికే చిత్రీకరణ పూర్తి చేసుకున్న ఈ చిత్ర ప్రచార కార్యక్రమాల్లో భాగంగా నవాజుద్దీన్ హైదరాబాద్‌లో పర్యటించారు.

ఈ సందర్భంగా కేసీఆర్ బయోపిక్ విషయమై స్పందించిన ఆయన ఈ చిత్రానికి సంబంధించి తననెవరూ సంప్రదించలేదని తెలిపారు. కేసీఆర్ వంటి మంచి నాయకుడి బయోపిక్‌లో నటించే అవకాశం వస్తే తనకు ఎలాంటి అభ్యంతరం లేదని వెల్లడించారు.