akhil: అఖిల్ తో సినిమా వర్మ చేజారినట్టే!

నాగార్జునతో రామ్ గోపాల్ వర్మ 'ఆఫీసర్' సినిమా చేసిన సంగతి తెలిసిందే. ఈ సినిమా సమయంలోనే తన తదుపరి సినిమా అఖిల్ తో ఉంటుందని వర్మ చెప్పాడు. అసలే సరైన హిట్ కోసం ఎదురుచూస్తోన్న అఖిల్ .. వర్మతో సినిమా చేయనుండటం ఎంతవరకూ కరెక్ట్ అనే విషయంపై అందరూ మాట్లాడుకున్నారు. నాగార్జున .. అఖిల్ మాత్రం ఈ విషయం గురించి ఎక్కడా ప్రస్తావించలేదు. అయితే తన నెక్స్ట్ మూవీ అఖిల్ తో ఉంటుందనడంలో ఎలాంటి సందేహం లేదని వర్మ మరోమారు క్లారిటీ ఇచ్చాడు.

ఈ క్రమంలో 'ఆఫీసర్' సినిమా విడుదల కావడం .. ప్లాప్ టాక్ తెచ్చుకోవడం జరిగిపోయాయి. దాంతో వర్మతో అఖిల్ మూవీ ఉంటుందా .. లేదా అనే సందేహంలో అభిమానులు వున్నారు. ఈ నేపథ్యంలో అఖిల్ మాట్లాడుతూ .. "వెంకీ అట్లూరితో సినిమా చేస్తున్నాను .. ప్రస్తుతం నా దృష్టి అంతా ఈ సినిమాపైనే వుంది. వేరే ఏ ప్రాజెక్టును గురించి నేను ఆలోచించడం లేదు .. అభిమానులకు నచ్చే సినిమాలు చేసుకుంటూ వెళ్లడమే నా ముందున్న లక్ష్యం" అంటూ చెప్పుకొచ్చాడు. అఖిల్ ధోరణి చూస్తుంటే ఆయన వర్మ సినిమా చేయడం లేదనే విషయాన్ని చెప్పకనే చెప్పాడనిపించడం లేదూ!