gali janardhan reddy: గాలి జనార్దన్ రెడ్డికి బీజేపీ అధిష్ఠానం షాక్?.. ఎన్నికల ప్రచారానికి దూరంగా మైనింగ్ కింగ్!

తన అనుచరులకు పెద్ద సంఖ్యలో బీజేపీ నుంచి టికెట్లు ఇప్పించుకున్న మైనింగ్ కింగ్ గాలి జనార్దన్ రెడ్డి... గత నాలుగు రోజులుగా ప్రచారానికి దూరంగా ఉంటున్నారు. ప్రస్తుతం ఈ అంశం అక్కడి రాజకీయాల్లో హాట్ టాపిక్ గా మారింది. బీజేపీ అధిష్ఠానం ఆదేశాల మేరకు ప్రచారానికి గాలి దూరంగా ఉన్నారని విశ్వసనీయంగా తెలుస్తోంది.

బాదామి నియోజకవర్గంలో ముఖ్యమంత్రి సిద్ధరామయ్యపై గాలి ప్రధాన అనుచరుడు శ్రీరాములు బరిలోకి దిగిన సంగతి తెలిసిందే. ఈ నేపథ్యంలో గాలి జనార్దన్ రెడ్డి మాట్లాడుతూ, బాదామిలో సిద్ధ రావణ (సిద్ధరామయ్య)ను మా శ్రీరాముడు సంహరిస్తాడంటూ వ్యాఖ్యానించారు. ఈ వ్యాఖ్యలు కలకలం రేపాయి. గాలి వ్యాఖ్యలపై కాంగ్రెస్ పార్టీ మండిపడింది. మరోవైపు, బీజేపీలోని కొందరు నేతలు కూడా ఈ వ్యాఖ్యలను తప్పుబట్టారు. ఈ నేపథ్యంలో, ఎన్నికల ప్రచారానికి దూరంగా ఉండాలంటూ గాలిని పార్టీ అధిష్ఠానం ఆదేశించినట్టు చెప్పుకుంటున్నారు.