Anushka Sharma: గుర్తుప‌ట్టలేకుండా ఉన్న అనుష్క శ‌ర్మ కొత్త లుక్‌... వైర‌ల్ అవుతున్న ఫొటో

పెళ్లి త‌ర్వాత సినిమా షూటింగుల్లో అనుష్క శ‌ర్మ బిజీ అయిపోయింది. ప్ర‌స్తుతం ఆనంద్ ఎల్ రాయ్, షారుక్ ఖాన్ 'జీరో' చిత్రంలోనూ, వ‌రుణ్ ధావ‌న్‌తో 'సూయ్ ధాగా' చిత్రంలోనూ ఆమె న‌టిస్తోంది. అందులో భాగంగా సూయ్ ధాగా చిత్రానికి సంబంధించి తాను ఎంబ్రాయిడ‌రీ చేస్తున్న‌ట్లుగా ఉన్న ఫొటోను అనుష్క షేర్ చేసింది. దాంతో పాటుగా ఈ సినిమా షూటింగ్‌కి సంబంధించి మ‌రో ఫొటో కూడా ఇంట‌ర్నెట్‌లో ద‌ర్శ‌న‌మిస్తోంది.

ఈ లీక‌యిన ఫొటోలో అనుష్క శ‌ర్మ గుర్తుప‌ట్టలేని విధంగా ఉంది. సాధార‌ణ మ‌ధ్య‌త‌ర‌గ‌తి మ‌హిళ‌గా చీర‌క‌ట్టుతో, ఎలాంటి మేక‌ప్ లేకుండా ఉన్న అనుష్క లుక్ అంద‌రినీ ఆక‌ట్టుకుంటోంది. త‌న మొద‌టి చిత్రం 'ర‌బ్ బ‌నే దీ జోడీ' సినిమాలో కూడా ఆమె ఇలాంటి పాత్ర‌లోనే క‌నిపించింది. కానీ ఆ గెట‌ప్‌తో పోల్చితే ఈ గెటప్ చాలా కొత్త‌గా ఉంద‌ని అభిమానులు అంటున్నారు.

ఏదేమైనా మ‌రోసారి డీగ్లామ‌రైజ్డ్ పాత్ర‌లో అనుష్క త‌న విశ్వ‌రూపం చూపించ‌నుంద‌ని వారు ఆనందం వ్య‌క్తం చేస్తున్నారు. అంతేకాకుండా తాను నిర్మిస్తూ, న‌టిస్తున్న 'ప‌రి' చిత్రంలో కూడా అనుష్క శ‌ర్మ స‌రికొత్త అవ‌తారంలో క‌నిపించ‌బోతున్న సంగ‌తి తెలిసిందే.