Venkaiah Naidu: ‘ఈ-సిగరెట్’ అంటే ఏమిటి?.. ఆరోగ్యశాఖా మంత్రిని అడిగిన వెంకయ్య.. సభలో నవ్వులు!

రాజ్యసభలో మంగళవారం కొన్ని సరదా సంభాషణలు జరిగాయి. రాజ్యసభ చైర్మన్ వెంకయ్యనాయుడు, ఆరోగ్యశాఖా మంత్రిని అడిగిన ప్రశ్నతో సభలో నవ్వులు విరిశాయి. ఈ-సిగరెట్లు తాగడం వల్ల వచ్చే ఆరోగ్య సమస్యలపై ప్రశ్నోత్తరాల సమయంలో జోరుగా చర్చ జరుగుతోంది. ఈ సందర్భంగా వెంకయ్యనాయుడు జోక్యం చేసుకుని.. ‘‘దేశం కోసం, సభ్యుల కోసం ఆరోగ్యశాఖా మంత్రిని ఓ విషయం అడగాలనుకుంటున్నా. ఇంతకీ ఈ-సిగరెట్ అంటే ఏమిటి?’’ అని ఆసక్తిగా ఆడగడంతో ఎంపీలు, మీడియా ప్రతినిధులు ఒక్కసారిగా నవ్వేశారు.

వెంకయ్య ప్రశ్నకు సమాధానంగా ఆరోగ్య మంత్రి జేపీ నడ్డా మాట్లాడుతూ.. ఈ-సిగరెట్ అనేది  నికోటిన్ పొగను ఇచ్చే ఓ పరికరమని, అందులో నికోటిన్ క్యాప్యూల్ వేస్తారని, పరికరం వేడెక్కడం ద్వారా పొగ బయటకు వస్తుందని, దానిని పీలుస్తారని  మంత్రి వివరించారు. అందులో పొగాకుకు బదులుగా నికోటిన్ వాడతారని పేర్కొన్నారు. సిగరెట్ తాగడం కంటే ఇది ఎక్కువ కిక్ ఇస్తుందని మంత్రి సభకు తెలిపారు.