barber: అల్లరి పిల్లాడికి 'కటింగ్' ఇలాగే ఇవ్వాలి మరి... నేలపై పడుకుని హెయిర్ కటింగ్ చేసిన బార్బర్!

  • తన పనిపై ఎంతో నిబ‌ద్ధ‌త ఉన్న బార్బ‌ర్
  • అల్లరి పిల్లాడితో పాటు నేలపై పడుకుని హెయిర్ కటింగ్ చేసిన వైనం
  • కటింగ్ చేస్తుండగా తీసిన ఫొటోకి అనూహ్య స్పందన

తన పనిపై ఎంతో నిబ‌ద్ధ‌త ఉన్న కెనడాకు చెందిన ఓ బార్బ‌ర్ చేసిన ప‌ని ప్ర‌పంచ వ్యాప్తంగా అంద‌రినీ క‌ట్టిప‌డేస్తోంది. ఇందుకు సంబంధించిన ఫొటో ఒక‌టి విప‌రీతంగా వైర‌ల్ అవుతోంది. అందులో ఓ అల్ల‌రి పిల్లాడికి స‌ద‌రు బార్బ‌ర్ క‌టింగ్ చేసేందుకు నేల‌పై ప‌డుకోవాల్సి వ‌చ్చింది. పూర్తి వివ‌రాల్లోకి వెళితే జ‌కాంబ్ అనే బార్బర్ వ‌ద్ద‌కు ఓ మ‌హిళ త‌న కుమారుడిని తీసుకొని వ‌చ్చి హెయిర్ క‌టింగ్ చేయ‌మ‌ని కోరింది.

ఆ ఆరేళ్ల‌ పిల్లాడికి వినికిడి శ‌క్తిలేదు. అలాగే మాట్లాడ‌లేడు కూడా. ప్ర‌తిసారి ఆ మ‌హిళ త‌న కుమారుడిని ఆ బార్బ‌ర్ వ‌ద్ద‌కే తీసుకెళ్తుంది. ఆ బాలుడు ఎవ‌రి మాటా వినిపించుకోకుండా విప‌రీతంగా అల్ల‌రి చేస్తూ ఉంటాడు. హెయిర్ క‌టింగ్ చేసే స‌మ‌యంలో ఆ బాలుడు కుదురుగా కూర్చోడు. ప్ర‌తిసారి త‌న వ‌ద్ద‌కే ఆ బాలుడు వ‌స్తుండ‌డంతో ఆ బాలుడు ఆ బార్బ‌ర్‌కి ఓ ఫ్రెండ్ అయిపోయాడు.  

కటింగ్ సమయంలో ఒక్కోసారి ఆ బాలుడు కుర్చీలో కూర్చోకుండా... ఆ క‌టింగ్ షాపంతా తిరుగుతూ ఉంటాడు. ఆ బాలుడి వెన‌కే వెళ్లి ఆ బార్బ‌ర్ క‌టింగ్ చేస్తుంటాడు. అయితే, తాజాగా ఆ బాలుడు మ‌రోలా ప్ర‌వ‌ర్తించాడు. త‌న తల్లి క‌టింగ్ షాప్‌కి తీసుకురాగానే అందులోనే నేల‌పై బోర్లా ప‌డుకున్నాడు. దీంతో ఆ బాలుడికి అక్క‌డే క‌టింగ్ చేయాల‌ని నిర్ణ‌యించుకున్న ఆ బార్బ‌ర్.. తాను కూడా నేలపై పడుకుని అక్క‌డే కటింగ్ చేసేశాడు. ఈ సంద‌ర్భంగా తీసిన ఫొటోలకి ఎన‌లేని స్పంద‌న వ‌స్తోంది.

More Telugu News