venkatesh: ఇది వెంకటేశ్ కోసం అనుకున్న కథ కాదు.. ఆ కథ వేరు!: దర్శకుడు ఓంకార్

నాగార్జున .. సమంత కీలకమైన పాత్రలను పోషించిన 'రాజుగారి గది 2' సినిమా.. మరో మూడు రోజుల్లో ప్రేక్షకుల ముందుకు రాబోతోంది. ఈ నేపథ్యంలో ఈ సినిమా తెరకెక్కడానికి దారితీసిన పరిస్థితులను గురించి తాజాగా ఐ డ్రీమ్స్ కి ఇచ్చిన ఇంటర్వ్యూలో ఓంకార్ చెప్పారు. 'రాజుగారి గది 2' పేరుతో తాను సిద్ధం చేసుకున్న కథను ముందుగా వెంకటేశ్ కి వినిపించడం జరిగిందనీ, ఆయనకి ఆ కథ బాగా నచ్చేసిందని అన్నారు. తాను కమిటైన రెండు సినిమాల తరువాత ఆయన ఈ సినిమా చేస్తానన్నారని చెప్పారు.

ఈ నేపథ్యంలో తాను పీవీపీ గారిని సరదాగా కలిసినప్పుడు ఆయన 'రాజుగారి గది 2' చేద్దామన్నారనీ, దాంతో తాను వెంకటేశ్ కి ఫోన్ చేశానని అన్నారు. అయితే తనకి వినిపించిన కథను మాత్రం తానే చేస్తానంటూ వెంకటేశ్ ఆ కథను లాక్ చేసుకున్నారని చెప్పారు. అప్పుడు అదే టైటిల్ తో .. మలయాళ మూవీ 'ప్రేతమ్' నుంచి తీసుకున్న ఓ పాయింట్ తో కొత్త కథను తయారుచేసుకోవడం జరిగిందని అన్నారు. ఇకపై కూడా ఇంగ్లిష్ మూవీస్ తరహాలో 'రాజుగారి గది'కి సీక్వెల్స్ వస్తూనే వుంటాయని చెప్పుకొచ్చారు.