dove: షాంపూ, సబ్బుల సంస్థ 'డవ్'పై తీవ్ర దుమారం!

షాంపూలు, సబ్బుల తయారీ సంస్థ డవ్ కు ప్రపంచ వ్యాప్తంగా మంచి గుర్తింపు ఉంది. అయితే, ఆ సంస్థపై ఇప్పుడు దుమారం చెలరేగుతోంది. ఫేస్ బుక్ లో డవ్ చేసిన ఓ యాడ్ దీనికి కారణం. ఓ నల్ల జాతీయురాలు తన షర్ట్ తీసేస్తే తెల్లటి మహిళగా మారిపోతుందంటూ డవ్ బాడీ వాష్ యాడ్ ను తన ఫేస్ బుక్ పేజ్ లో పోస్ట్ చేసింది. ఈ యాడ్ జాత్యహంకారాన్ని చూపుతోందంటూ నెటిజన్లు ఫైర్ అవుతున్నారు. నల్ల జాతీయురాలు తెల్ల జాతీయురాలిగా మారడం జాత్యహంకారమేనని వారు మండిపడుతున్నారు.

శుభ్రమైన శరీరం అంటే తెల్ల రంగు శరీరం కాదని అట్లాంటాకు చెందిన ఓ ప్రొఫెసర్ మండిపడ్డారు. నల్ల రంగు శరీరం చెత్త, తెల్ల రంగు శరీరం శుభ్రమైనదనే విధంగా ఈ యాడ్ ఉందని అన్నారు. తాను డవ్ ఉత్పత్తులను చాలా కాలంగా వాడుతున్నానని... ఇకపై వీటిని వాడబోనని ఆయన తెలిపారు. డవ్ ఇలా చేయడం ఇదే తొలిసారి కాదు. ఇలాంటి జాత్యహంకార ప్రకటనలు ఇంతకు ముందు చాలాసార్లు ప్రచురించింది.