ap7am logo
Logo Bar bseindia nse-india msn yahoo youtube facebook google thehindu bbc ndtv v6 ABN NTv Tv9 etv namasthetelangaana sakshi andhrajyothy eenadu ap7am bhakti espncricinfo wikipedia twitter

భూలోక స్వర్గం.. థాయిల్యాండ్ ట్రిప్ ఇలా ప్లాన్ చేసుకోండి!

Fri, Mar 18, 2016, 10:20 AM
Related Image

పర్యాటకుల స్వర్గధామం  థాయిల్యాండ్. ఎన్నోసుందర ప్రదేశాలు సందర్శకుల మదిని దోచేస్తాయి. అందుకే భారతీయ సినిమాల సన్నివేశాల చిత్రీకరణకు ఎక్కువగా ఇక్కడకు వస్తుంటారు. మరి ఆ అందాలను చూడాలని అనుకుంటే పర్యటనకు ప్లాన్ చేసుకోండి...  

విమానయాన చార్జీలు, ఆహారం, వసతి చార్జీలు

చెన్నై నుంచి బ్యాంకాక్ (థాయిలాండ్ రాజధాని)కు విమానంలో చెక్కేయాలంటే ప్రారంభ టికెట్ చార్జీలు సుమారు 7,600 రూపాయల నుంచి ఉన్నాయి. నెలరోజులు ముందుగా బుక్ చేసుకుంటే ఈ ధర. ఒకరోజు ముందు అయితే రూ.13,000 వరకు వెచ్చించాల్సి వస్తుంది. రెండు నెలలు ముందుగా బుక్ చేసుకుంటే రూ.6,000కే లభిస్తాయి. బెంగళూరు నుంచి కూడా ఇంచుమించు ఇవే ధరలు (2017 ఏప్రిల్ లో) ఉన్నాయి. హైదరాబాద్ నుంచి అయితే 10,500 రూపాయల నుంచి ఉన్నాయి. బ్యాంకాక్ లో ట్యాక్సీల్లో ప్రయాణించాలంటే…  ప్రారంభ చార్జీ 35 థాయ్ బాట్ (టీహెచ్ బీ). కిలోమీటర్ వరకు ఈ ధర అమలవుతుంది. ఒక టీహెచ్ బీ భారతీయ కరెన్సీలో సుమారు రెండు రూపాయలు. ఆ తర్వాత నుంచి పది కిలోమీటర్ల వరకు ప్రతీ కిలోమీటర్ కు 5.50 టీహెచ్ బీలను చార్జీ వసూలు చేస్తారు. ఆ తర్వాత నుంచి 20 కిలోమీటర్ల వరకు కిలోమీటర్ కు 6.50 టీహెచ్ బీల చార్జీ ఉంటుంది. ఇలా పెరుగుతూ ఉంటుంది. తీవ్ర ట్రాఫిక్ జామ్ లో గంటకు ఆరు కిలోమీటర్ల దూరం మించి వెళ్లలేని పరిస్థితుల్లో అదనంగా చార్జీ ఉంటుంది. హోటల్ ముందు కాకుండా కొంచెం పక్కకు వచ్చి ట్యాక్సీలను మాట్లాడుకోవడం నయం. మీటర్ వేస్తేనే వాహనం ఎక్కండి. లేదంటే ఎక్కువ చార్జీ వసూలు చేస్తారు. 

representational imageబ్యాంకాక్ లో పైన తీగల మార్గంలో (రోప్ వే) ప్రయాణించాలనుకునేవారికి బీటీఎస్ వ్యవస్థ ఉండనే ఉంది. ఇందులో తక్కువ చార్జీకే త్వరగా గమ్యస్థానానికి చేరుకోవచ్చు. అయితే, వీటిలో రష్ ఎక్కువగా ఉంటుంది. వారాంతంలో రద్దీ తగ్గుతుంది. వీటిలో ప్రయాణ చార్జీలు 20 నుంచి 40 టీహెచ్ బీల మధ్యలో ఉంటాయి. బస్సుల్లో ప్రయాణ చార్జీలు 6.50 టీహెచ్ బీల నుంచి 20 టీహెచ్ బీల వరకు ఉంటాయి. ద్విచక్ర వాహన ట్యాక్సీలను కూడా అద్దెకు తీసుకోవచ్చు. బ్యాంకాక్ కు వెలుపల బస్సు సర్వీసులు, రైల్, ట్యాక్సీ సేవలు సౌకర్యంగా ఉంటాయి.

హోటల్లో విడిది చార్జీల విషయానికొస్తే… బడ్జెట్ హోటల్లో ఒక రోజుకు గాను చార్జీ మన కరెన్సీలో 500 రూపాయల వరకు ఉంటుంది. స్టాండర్డ్ హోటల్స్ లో బస చేయాలంటే 700 రూపాయల నుంచి వ్యయమవుతుంది. వివరాలకు http://www.bangkok.com/hotels/price.htm ఈ సైట్ ను సందర్శించవచ్చు. భారతీయ ఆహారం కోరుకునేవారు వీధి పక్కన బండ్లపై లాగించేద్దామనుకుంటే చైనాటౌన్ సమీపంలోని పహురత్ కు వెళ్లాలి. లేదా భారతీయ జనాభా ఎక్కువగా ఉండే ప్రతునమ్ ప్రాంతానికి వెళ్లినా కోరుకున్న ఆహారం లభిస్తుంది. ఇక్కడ భారీ సంఖ్యలో భారతీయ రెస్టారెంట్లు ఉన్నాయి. 

ఓ పది ప్రముఖ భారతీయ రెస్టారెంట్ల వివరాలను http://www.10best.com/destinations/thailand/bangkok/restaurants/indian/ వెబ్ సైట్ కు వెళ్లి తెలుసుకోవచ్చు. ఉత్తరాది, దక్షిణాది భారతీయ వంటకాలకు పేరుగాంచిన ఉడ్ ల్యాండ్స్ రెస్టారెంట్ కూడా ఉంది. ఇక్కడ ఒక చపాతి 15 టీహెచ్ బీ, తందూరి రోటి 20 టీహెచ్ బీ, అలూ పరాటా 50 టీహెచ్ బీ, చికెన్ పరాటా 130 టీహెచ్ బీల ధరల్లో ఉన్నాయి. ప్లెయిన్ రైస్ ధర 30 టీహెచ్ బీలు కాగా, వెజిటబుల్ కర్రీ తీసుకోవాలంటే 110 టీహెచ్ బీలు చెల్లించాలి. పప్పు ఒకటి చాలనుకుంటే 60 టీహెచ్ బీలు. 

representational image

టూర్ ప్యాకేజీలు

రూ.27,668 రూపాయల యాత్రా సంస్థ ప్యాకేజీతో థాయిల్యాండ్ లోని బ్యాంకాక్, పట్టాయా నగరాలను చూసి రావచ్చు. ఐదు రోజుల పర్యటనలో రెండు రాత్రులు పట్టాయాలో, రెండు రాత్రులు బ్యాంకాక్ లో విడిది. రానుపోను విమానయానం, బ్రేక్ ఫాస్ట్ ఉచితం. జీఎస్టీ 3.6 శాతం అదనం. ఇక ఫుకెట్, బ్యాంకాక్ పర్యటనల ప్యాకేజీ ధర రూ.51,990. ఇదే ప్యాకేజీని థామస్ కుక్ 46,500 రూపాయలకు ఆఫర్ చేస్తోంది. ఫుకెట్, క్రాబి, బ్యాంకాక్ ల ప్యాకేజీని 54,500 రూపాయలకు అందిస్తోంది. పట్టాయా, బ్యాంకాక్ ల పర్యటన వరకే అయితే, 27,925 రూపాయలకు అందిస్తోంది. మేక్ మై ట్రిప్ ఇదే తరహా టూర్ ప్యాకేజీకి 33,990 చార్జ్ చేస్తోంది. ఈ ప్యాకేజీల్లో భాగంగా టూరిజం సంస్థలు అన్ని ప్రదేశాలను చూపించవు. రోజులో కేవలం ఒక పూట మాత్రమే పరిమిత సందర్శనకు తీసుకెళతాయి. కాబట్టి ముందుగానే టూర్ లో భాగంగా ఏమి చూడాలన్న విషయమై ప్లాన్ తో  ఉంటే మంచిది. ఈ ప్యాకేజీల ధరలనేవి మారుతూ ఉంటాయి. కనుక పర్యటనకు ముందుగానే సంబంధిత సంస్థల వెబ్ సైట్లను ఆశ్రయించడం ద్వారా తాజా ధరలను తెలుసుకోవచ్చు.

సందర్శనీయ స్థలాలు

* క్రాబి ప్రావిన్స్ లో ఉన్న ఫిఫి ద్వీప సమూహం అధిక సంఖ్యలో పర్యాటకులను ఆకర్షిస్తున్న ప్రాంతం. ఇక్కడ తరచూ సినిమా షూటింగు లు జరుగుతుంటాయి. 

* పాంగ్ ఎన్జీయే బే… ఇది ఫుకెట్ ఐలాండ్ కు 95 కిలోమీటర్ల దూరంలో ఉంది. థాయిల్యాండ్ లోని  అత్యద్భుతమైన సుందర ప్రదేశం. సముద్రం మధ్యలో చిన్న చిన్న కొండలతో ఎంతో అందంగా ఉండే ఈ ప్రదేశం ఎన్నో సినిమాల్లో ఇప్పటికే చూసి ఉంటారు. ఇక ప్రత్యక్షంగా చూస్తే... ఆ ఆనందమే వేరు! 

* గ్రాండ్ ప్యాలస్.. బ్యాంకాక్ లో ఉన్న ఈ రాజ ప్రాసాదం చావో నది ఒడ్డున సుందరమైన నిర్మాణ శైలితో అపురూపంగా ఉంటుంది. 

* ముకోచాంగ్ నేషనల్ పార్క్ మొత్తం 50 ద్వీపాల్లో విస్తరించి ఉంది. కొండలు, అటవీ ప్రాంతంతో మరోవైపు సాగరుడి అందాలతో చూడచక్కగా అనిపిస్తుంది. 

* థాయిల్యాండ్-బర్మా డెత్ రైల్వే... కాంచనబురి నుంచి క్వాయ్ నది వంతెన మీదుగా నామ్ టోక్ వరకు రెండు గంటల ప్రయాణం అనిర్వచనీయమైన అనుభూతిని అందిస్తుంది. 

* కో ఫాంగాన్ ద్వీపంలోని హాడ్ రిన్ ప్రాంతంలో ప్రతి నెలా పున్నమి నాడు ఫుల్ మూన్ పార్టీ ఉంటుంది. సూర్యాస్తమయం తర్వాత ప్రారంభమయ్యే ఈ పార్టీకి సుమారు 30 వేల మంది వరకు హాజరవుతుంటారు. 

representational image* సూర్య దేవాలయం వాట్ అరుణ్ చూడకుండా థాయిల్యాండ్ పర్యటన సంపూర్ణం కాదు. చూడచక్కని నిర్మాణ నైపుణ్యం ఈ ఆలయంలో ఉట్టిపడుతుంది. చావో ఫ్రాయ నది ఒడ్డున బ్యాంకాక్ లో ఉందీ ఆలయం. దీని ఎత్తు 280 అడుగులు. 

* ఖావో సాక్ నేషనల్ పార్క్ సహజసిద్ధమైన ప్రకృతి సౌందర్యంతో ప్రముఖ పర్యాటక ప్రాంతంగా ఉంది. ప్రపంచంలో 5 శాతం జంతు జాతులకు ఇది ఆవాసంగా వర్ధిల్లుతోంది. 

* బ్యాంకాంక్ లో చాతుచాక్ వీకెండ్ మార్కెట్ ను ప్రపంచంలోనే అతిపెద్ద వారాంతపు సంతగా చెబుతుంటారు. సుమారు 8వేల స్టాళ్లు కొలువు దీరతాయి. ప్రతీవారం సుమారు 2 లక్షల మంది షాపింగ్ చేస్తుంటారు.  చియాంగ్ మాయ్ పట్టణంలోని అతిపెద్ద నైట్ బజార్ కూడా పర్యాటకులను ఆకర్షించే వాటిలో ఒకటి. 

* థాయిల్యాండ్ లో బౌల్ ఆఫ్ గోల్డ్ అనే పార్క్ ను కూడా తప్పక సందర్శించాలి. 42 చిన్న చిన్న దీవులు పక్క పక్కనే విసిరేసిన రాళ్లలా విస్తరించి ఉంటాయి. వీటిలో పర్యాటకుల విడిదికి అన్ని రకాల సౌకర్యాలు ఉన్నాయి.  

* 11, 12వ శతాబ్ద కాలంలో కెమెర్ రాజ్యంలో నిర్మించిన ఆలయాలు నాటి చరిత్రకు నిదర్శనంగా కనిపిస్తాయి. ఇక్కడ హిందూ దేవతల శిల్పాలు దర్శనమిస్తాయి. 

* బ్యాంకాక్ సిటీకి వెలుపల ఉన్న ఫ్లోటింగ్ మార్కెట్ల సందర్శన కూడా మరపురానిదే. నీళ్లలో పడవల్లో తిరుగుతూ షాపింగ్ చేయడం అదో ప్రత్యేక అనుభవం, అనుభూతి! 

* ఎరవణ్ నేషనల్ పార్క్ లోని ఎరవణ్ జలపాతాలు మంత్రముగ్ధులను చేసేస్తాయి. హిందూ పురాణాల్లోని మూడు తలల తెల్ల ఏనుగు పేరు ఈ జలపాతాలకు స్థిరపడింది. ఐరావతాన్ని థాయ్ భాషలో ఎరవణ్ గా పిలుస్తారు. 

X

Feedback Form

Your IP address: 54.162.203.39
Articles (Education)