Ajith: ఓటీటీ ఫ్లాట్ ఫామ్ పైకి వస్తున్న సినిమాలు ఇవే.. వాల్తేరు వీరయ్య కూడా!

ఓటీటీ ఫ్లాట్ ఫామ్ పై వరుసగా సినిమాలు సందడి చేయనున్నాయి. ఈనెల 27 నుంచి నెట్ ఫ్లిక్స్ లో వాల్తేరు వీరయ్య స్ట్రీమింగ్ కానుంది. అంతకంటే ముందు ఈ వారంలో 3 సినిమాలు పలు ఓటీటీ ఫ్లాట్ ఫామ్స్ లో టెలికాస్ట్ కానున్నాయి.

అజిత్ హీరోగా తమిళంలో రూపొందిన 'తునీవు' (తెగింపు) సినిమాను బోనీ కపూర్ నిర్మించగా, హెచ్ వినోత్ దర్శకత్వం వహించాడు. జనవరి 11వ తేదీన థియేటర్లకు వచ్చిన ఈ సినిమా, ఆశించిన స్థాయిలో ఆకట్టుకోలేకపోయింది. అలాంటి ఈ సినిమా ఈ నెల 8వ తేదీ నుంచి 'నెట్ ఫ్లిక్స్'లో స్ట్రీమింగ్ కానుంది. 

ఇక చిన్న సినిమాగా నిర్మితమైన 'రాజయోగం' .. క్రితం ఏడాది డిసెంబర్ 23వ తేదీన ప్రేక్షకులను పలకరించింది. సాయి రోనక్ - అంకిత సాహ జంటగా నటించిన ఈ సినిమా కూడా థియేటర్స్ నుంచి ఆశించిన స్థాయి రెస్పాన్స్ ను రాబట్టుకోలేకపోయింది. ఈ నెల 9వ తేదీ నుంచి ఈ సినిమాను 'డిస్నీ ప్లస్ హాట్ స్టార్' వారు స్ట్రీమింగ్ చేస్తున్నారు. 

సుధీర్ బాబు హీరోగా నటించిన 'హంట్' జనవరి 26వ తేదీన థియేట్రికల్ రిలీజ్ ను జరుపుకుంది. శ్రీకాంత్ - భరత్ ముఖ్యమైన పాత్రలను పోషించిన ఈ సినిమా, భవ్య క్రియేషన్స్ బ్యానర్ పై విడుదలైంది. మహేశ్ సూరపనేని దర్శకత్వం వహించిన ఈ సినిమా ఆడియన్స్ ను ఆకట్టుకోలేకపోయింది. ఈ నెల 10వ తేదీ నుంచి ఈ సినిమా 'అమెజాన్ ప్రైమ్' లో స్ట్రీమింగ్ కానుంది.

మెగాస్టార్ చిరంజీవి హీరోగా బాబీ దర్శకత్వంలో తెరకెక్కిన వాల్తేరు వీరయ్య.. సంక్రాంతికి విడుదలై ఘన విజయం సాధించింది. చిరంజీవి, రవితేజ కాంబినేషన్ లో వచ్చిన ఈ మూవీ కోట్ల కలెక్షన్లు రాబట్టింది. నిన్నటితో 25 రోజులు పూర్తి చేసుకుంది. ఇన్ని రోజులు సినిమా హాళ్లలో హంగామా సృష్టించిన ఈ సినిమా.. ఇక ఓటీటీలోనూ సందడి చేయనుంది. వాల్తేరు వీరయ్య ఓటీటీ హక్కులను దక్కించుకున్న నెట్ ఫ్లిక్స్.. స్ట్రీమింగ్ ఎప్పుడనేది ప్రకటించేసింది. ఈనెల 27 నుంచి సినిమాను టెలికాస్ట్ చేయనున్నట్లు అధికారికంగా వెల్లడించింది. ఈ మేరకు ట్విట్టర్ లో ప్రకటన చేసింది.