Idols: అమెజాన్ లో విగ్రహాలు కొనుగోలు చేసి పొలంలో దొరికాయని నమ్మించే ప్రయత్నం చేసిన ఘనుడు!

అప్పుడప్పుడు తవ్వకాల్లోనూ, వ్యవసాయ పనుల సందర్భంగా పురాతన విగ్రహాలు లభ్యం కావడం తెలిసిందే. అవి దేవతా విగ్రహాలు అయితే అక్కడ ఓ ఆలయం నిర్మించడం, ఆపై అది పుణ్యక్షేత్రంగా విలసిల్లడం తెలిసిందే. సరిగ్గా ఈ అంశాన్ని సొమ్ము చేసుకోవాలని ఉత్తరప్రదేశ్ లోని వున్నావోకు చెందిన ఓ యువకుడు ఎత్తుగడ వేశాడు. 

ఈ-కామర్స్ సైట్ అమెజాన్ లో రూ.165 ఖర్చుతో చిన్న విగ్రహాలను కొనుగోలు చేసి, వాటిని తన పొలంలో పాతిపెట్టాడు. తిరిగి వాటిని తనే తవ్వి తీసి తన పొలంలో వ్రిగహాలు దొరికాయంటూ ప్రచారం చేశాడు. 

అక్కడే తాత్కాలికంగా ఓ మందిరం ఏర్పాటు చేయగా, గ్రామస్థులు అతడి ప్రచారాన్ని నమ్మి పూజలు చేయడం, నగదు కానుకలు కూడా సమర్పించడం ప్రారంభించారు. అయితే, ఈ విగ్రహాలను ఆన్ లైన్ లో డెలివరీ ఇచ్చిన వ్యక్తి అందించిన సమాచారం మేరకు పోలీసులు రంగప్రవేశం చేయడంతో బండారం బట్టబయలైంది. విగ్రహాల ఎత్తుగడకు పాల్పడిన యువకుడి కుటుంబంలోని ముగ్గురిని పోలీసులు అదుపులోకి తీసుకున్నారు. అంతేకాదు, పొలంలో దొరికినట్టుగా ప్రచారం జరిగిన చిన్న విగ్రహాలను కూడా పోలీసులు స్వాధీనం చేసుకున్నారు.