Pawan Kalyan: తెలుగోడు తొడకొట్టాడు... పవన్ కల్యాణ్ 'హరిహర వీరమల్లు' నుంచి 'పవర్ గ్లాన్స్' వీడియో ఇదిగో!

టాలీవుడ్ పవర్ స్టార్ పవన్ కల్యాణ్ హీరోగా క్రిష్ దర్శకత్వంలో వస్తున్న చిత్రం హరిహర వీరమల్లు. ఇవాళ (సెప్టెంబరు 2) పవన్ కల్యాణ్ పుట్టినరోజు సందర్భంగా ఈ చిత్రం నుంచి పవర్ గ్లాన్స్ వీడియో రిలీజ్ చేశారు. ఇందులో పవన్ కొంతమంది వస్తాదులతో పోరాడి వారిని మట్టికరిపించిన దృశ్యాలున్నాయి. విజయనాదం చేస్తూ పవన్ తొడకొట్టడాన్ని ఈ పవర్ గ్లాన్స్ వీడియోలో చూడొచ్చు. 

వాస్తవానికి ఈ పవర్ గ్లాన్స్ ను నేటి సాయంత్రం విడుదల చేస్తామని చిత్రబృందం గత ప్రకటనలో పేర్కొన్నా, ముందుగానే విడుదల చేసి అభిమానులకు ట్రీట్ ఇచ్చారు. "మెడల్ని వంచి కథల్ని మార్చి కొలిక్కితెచ్చే పనెట్టుకుని తొడకొట్టాడో తెలుగోడు" అంటూ ఈ వీడియోకి క్యాప్షన్ ఇచ్చారు. 

పీరియాడిక్ యాక్షన్ డ్రామాగా రూపుదిద్దుకుంటున్న హరిహర వీరమల్లు చిత్రంలో పవన్ కల్యాణ్ సరసన నిధి అగర్వాల్ కథానాయిక. మెగా సూర్య ప్రొడక్షన్ బ్యానర్ పై ఏఎం రత్నం, దయాకర్ రావు నిర్మిస్తున్న ఈ భారీ చిత్రానికి ఎంఎం కీరవాణి సంగీతం అందిస్తున్నారు.