Rajinikanth: ఇది ప్రతి ఒక్కరూ తప్పక చూడాల్సిన సినిమా: రజనీకాంత్

మాధవన్ ప్రధానపాత్ర పోషించిన చిత్రం 'రాకెట్రీ: ద నంబి ఎఫెక్ట్'. ఈ సినిమాను మాధవన్ స్వీయదర్శకత్వంలో తెరకెక్కించాడు. జులై 1న ప్రేక్షకుల ముందుకు వచ్చిన ఈ చిత్రం విశేష ప్రజాదరణ పొందుతోంది. కాగా, ఈ చిత్రంపై దక్షిణాది సూపర్ స్టార్ రజనీకాంత్ స్పందించారు. ఇది ప్రతి ఒక్కరూ తప్పక చూడాల్సిన సినిమా అని పేర్కొన్నారు. ముఖ్యంగా యువత ఈ సినిమా చూడాలని పిలుపునిచ్చారు. 

భారత అంతరిక్ష పరిశోధన రంగం అభివృద్ధి కోసం శాస్త్రవేత్త నంబి నారాయణన్ అనేక కష్టనష్టాలకు ఓర్చి పనిచేశారని రజనీకాంత్ వెల్లడించారు. ఆయన ఎన్నో త్యాగాలు చేశారని తెలిపారు. అటువంటి గొప్ప శాస్త్రవేత్త జీవితాన్ని తెరకెక్కించే క్రమంలో మేటి దర్శకుల తీరులో మాధవన్ దర్శకత్వం ఉందని కొనియాడారు. ఇలాంటి ఉన్నతమైన చిత్రాన్ని అందించినందుకు మాధవన్ కు కృతజ్ఞతలు తెలుపుకుంటున్నానని, అదే సమయంలో అభినందిస్తున్నానని రజనీకాంత్ ట్విట్టర్ లో ప్రకటన చేశారు.