Samantha: సమంత హవా దేశమంతటా!

మన దేశంలో ఎక్కువ ప్రజాదరణ ఉన్న హీరోయిన్ ఎవరు? అంటే దీపిక పదుకొనె, ఆలియా భట్లో  ఒకరు అనుకుంటాం. ఈ మధ్య దూసుకెళ్తున్న కియారా ఆద్వాణీ అని కూడా కొందరు చెబుతారు. కానీ, వీళ్లెవరూ కాదట. దక్షిణాదిలో అగ్ర నటిగా వెలుగొందుతున్న సమంత.. భారత్ లో మోస్ట్ పాపులర్ హీరోయిన్. ఈ మేరకు ఇటీవల ‘ఓర్మాక్స్ సంస్థ’...  ‘ఓర్మాక్స్ స్టార్స్ ఇండియా లవ్స్’ పేరిట మన దేశంలో మోస్ట్ పాపులర్ హీరోయిన్ ఎవరు అంటూ ఓ సర్వే నిర్వహించింది. అందులో అగ్రస్థానంలో నిలిచి అందరినీ ఆశ్చర్య పరిచింది సమంత. ఆలియా భట్ రెండో స్థానంలో ఉండగా.. నయనతారది మూడో ప్లేస్. దీపికా పదుకొనె ఐదో స్థానంలో నిలవడం గమనార్హం. తర్వాత  కాజల్ అగర్వాల్‌,  కీర్తి సురేష్, కత్రినా కైఫ్, రష్మిక, పూజ హెగ్డే, అనుష్కా శెట్టిలకు చోటు దక్కింది.

 సమంత ఇప్పటిదాకా ఒక్క హిందీ సినిమాలో కూడా హీరోయిన్ గా నటించలేదు. అయినా బాలీవుడ్ లోనూ ఆమెకు ఇంత క్రేజ్ రావడం విశేషం. దక్షిణాది అన్ని భాషల్లో సత్తా చాటుకున్న సమంత.. ‘ది ఫ్యామిలీ మ్యాన్’ వెబ్ సిరీస్ రెండో భాగంలో కీలక పాత్రతో హిందీ జనాలకు చేరువైంది. ఆమె నటనకు అంతా ఫిదా అయ్యారు. ‘పుష్ప’సినిమాలో ఊ అంటావా స్పెషల్ సాంగ్ తర్వాత 
 బాలీవుడ్‌లోనూ సమంత పేరు మార్మోగుతోంది. 

 ప్రస్తుతం సమంత హిందీలో ఒక వెబ్ సిరీస్ లో నటిస్తోంది. అలాగే, మరో హీరోయిన్ తాప్సీ నిర్మించే నాయికా ప్రాధాన్యం ఉన్న చిత్రానికి కూడా ఒకే చెప్పింది. ఈ మధ్య సల్మాన్‌ ఖాన్ సినిమా కోసం కూడా సమంతను అడిగినట్లు తెలుస్తోంది. సల్మాన్ హీరోగా అనీజ్ బజ్మీ దర్శకత్వంలో ‘నో ఎంట్రీ’ చిత్రానికి సీక్వెల్ ప్రకటించారు. ఇందులో హీరోయిన్‌గా సమంత కోసం ప్రయత్నిస్తున్నట్టు సమాచారం. సమంత ఒప్పుకుంటే మాత్రం బాలీవుడ్లో ఆమె హవా మరింత పెరగడం ఖాయం.