Anand Mahindra: ట్రాక్టర్ నడుపుకుంటూ వచ్చిన పెళ్లికూతురు... స్పందించిన ఆనంద్ మహీంద్రా

మధ్యప్రదేశ్ లోని బేతుల్ లో ఆశ్చర్యకర సంఘటన జరిగింది. పెళ్లి చేసుకుంటున్న ఓ యువతి స్వయంగా ట్రాక్టర్ నడుపుకుంటూ వివాహ వేదిక వద్దకు చేరుకుంది. ఆ పెళ్లికూతురు పేరు భారతి తార్గే. సాధారణంగా పెళ్లికొడుకులు కారులోనో, కొన్ని సందర్భాల్లో గుర్రం మీదో పెళ్లివేదిక వద్దకు రావడం సహజం. పెళ్లికూతురినైతే ఎంతో పదిలంగా తీసుకువస్తారు. 

కానీ, భారతీ తార్గే అందుకు భిన్నంగా బంధుమిత్రులతో కలిసి ఓ ట్రాక్టర్ పై ఊరేగింపుగా వచ్చింది. ఆమె ట్రాక్టర్ ను స్వయంగా నడపడంతో అందరి దృష్టిని ఆకర్షించింది. దీనికి సంబంధించిన వీడియో వైరల్ అయింది. ఇక, సోషల్ మీడియాలో ఎంతో యాక్టివ్ గా ఉండే ప్రముఖ వ్యాపారవేత్త ఆనంద్ మహీంద్రా కూడా ఈ వీడియోను చూశారు. చూసిన తర్వాత స్పందించకుండా ఉండలేకపోయారు. 

"పెళ్లికూతురి పేరు భారతి... ఆమె నడుపుతున్నది స్వరాజ్ (మహీంద్రా రైజ్ బ్రాండ్ ట్రాక్టర్)... ఇది ఎంతో అర్థవంతంగా ఉంది" అంటూ ఆనంద్ ట్వీట్ చేశారు. అంతేకాదు, పెళ్లికూతురు డ్రైవింగ్ వీడియోను కూడా పంచుకున్నారు.