Balakrishna: బాలయ్య 107వ చిత్రం టైటిల్ ఇదేనంటూ జోరుగా ప్రచారం!

బాలకృష్ణ నటించిన 'అఖండ' చిత్రం ఘన విజయాన్ని సాధించిన సంగతి తెలిసిందే. కరోనా మహమ్మారి కారణంగా దిక్కుతోచని స్థితికి వెళ్లిన ఇండస్ట్రీకి 'అఖండ' అంతులేని ధైర్యాన్ని అందించింది. ఈ చిత్రం తర్వాత భారీ చిత్రాలన్నీ వరుసగా విడుదలయ్యాయి. 

మరోవైపు ప్రస్తుతం తన 107వ చిత్రాన్ని గోపీచంద్ మలినేని దర్శకత్వంలో బాలయ్య చేస్తున్నారు. ఈ సినిమాలో బాలయ్య సరసన శ్రుతిహాసన్ నటిస్తోంది. శరవేగంగా ఈ చిత్రం షూటింగ్ జరుపుకుంటోంది. 'అఖండ' తర్వాత వస్తున్న చిత్రం కావడంతో ఈ సినిమాపై అభిమానులు భారీ అంచనాలనే పెట్టుకున్నారు. 

ఈ చిత్రానికి సంబంధించిన ఫస్ట్ లుక్ ను ఇప్పటికే చిత్ర యూనిట్ విడుదల చేయగా... ఆ లుక్ అభిమానులను విశేషంగా ఆకట్టుకుంది. అయితే ఈ సినిమా టైటిల్ ఏంటనే చర్చ కొన్ని రోజులుగా సాగుతోంది. సోషల్ మీడియాలో జై బాలయ్య, నటసింహం, పెద్దన్నయ్న వంటి పేర్లు చక్కర్లు కొట్టాయి. అయితే ఈ సినిమాకు 'అన్నగారు' అనే టైటిల్ ను ఫిక్స్ చేసినట్టు తాజా సమాచారం. జూన్ 10వ తేదీన బాలయ్య పుట్టినరోజు సందర్భంగా సినిమా టీజర్, టైటిల్ ను ప్రకటించనున్నట్టు తెలుస్తోంది. ఈ చిత్రంలో బాలయ్య ద్విపాత్రాభినయం  చేస్తున్నారు.