Fire Accident: పంజాబ్‌లో ఒకే కుటుంబానికి చెందిన ఏడుగురి సజీవ దహనం
- లుథియానాలోని తాజ్‌పూర్‌ రోడ్డులో అగ్ని ప్రమాదం
- ఓ గుడిసెలో కుటుంబ స‌భ్యులు నిద్రిస్తుండగా మంటలు
- మృతుల్లో దంపతులు, వారి ఐదుగురు పిల్ల‌లు
పంజాబ్‌లో తీవ్ర విషాద ఘ‌ట‌న చోటు చేసుకుంది. ఈ రోజు తెల్లవారుజామున లుథియానాలోని తాజ్‌పూర్‌ రోడ్డులోని ఓ గుడిసెలో ఘోర అగ్ని ప్రమాదం చోటుచేసుకుని దంపతులు సహా ఐదుగురు చిన్నారులు సజీవ ద‌హ‌న‌మ‌య్యారు. వారంతా నిద్రిస్తుండగా మంటలు చెలరేగాయని అధికారులు తెలిపారు. మృతుల్లో దంపతులు, వారి నలుగురు కుమార్తెలు, కుమారుడు (1) ఉన్నార‌ని చెప్పారు.
ఆ స‌మ‌యంలో వేరే ప్రాంతంలో వీరి మరో కుమారుడు రాజేశ్‌(17) నిద్రించ‌డంతో అత‌డు ఒక్కడే ఆ కుటుంబంలో ప్రాణాలతో మిగిలాడ‌ని వివ‌రించారు. ఈ రోజు తెల్లవారుజామున 3 గంటలకు అగ్ని ప్ర‌మాదంపై సమాచారమందుకున్న అగ్నిమాపక సిబ్బంది ఘటనాస్థలికి చేరుకునేలోపే ఆ కుటుంబ స‌భ్యులు మృతి చెందార‌ని అన్నారు. అగ్ని ప్రమాదం ఎలా చోటు చేసుకుంద‌న్న విష‌యంపై పోలీసులు ద‌ర్యాప్తు ప్రారంభించారు.
