Prabhas: పోలీసులు చలాన్లు రాసిన కారుతో ప్రభాస్ కు సంబంధం లేదు: పీఆర్ఓ వివరణ

గత కొన్నిరోజులుగా హైదరాబాద్ ట్రాఫిక్ పోలీసులు నిబంధనల అమలులో కఠినంగా వ్యవహరిస్తున్నారు. వాహనాల అద్దాలకు బ్లాక్ ఫిలిం ఉంటే ఏమాత్రం ఉపేక్షించకుండా చలాన్లు రాస్తున్నారు. ఇప్పటికే పలువురు టాలీవుడ్ ప్రముఖుల కార్లకు జరిమానా విధించారు. 

ఈ క్రమంలో, నేడు హైదరాబాదులో హీరో ప్రభాస్ కారుకు కూడా పోలీసులు చలాన్లు రాసినట్టు వార్తలు వచ్చాయి. కారు అద్దాలకు బ్లాక్ ఫిలిం ఉందని, కారు నెంబరు ప్లేటు కూడా సరిగా లేదని పోలీసులు గుర్తించారని ఆయా వార్తల్లో పేర్కొన్నారు. 

అయితే, ఈ కథనాలపై ప్రభాస్ పీఆర్ఓ వివరణ ఇచ్చారు. ఇవాళ హైదరాబాదు రోడ్ నెం.36లో ప్రభాస్ కారుకు హైదరాబాద్ పోలీసులు జరిమానా విధించినట్టు వార్తలు వస్తున్నాయని, కానీ ఆ కారుకు, హీరో ప్రభాస్ కు ఎలాంటి సంబంధం లేదని స్పష్టం చేశారు. మీడియాలో జరుగుతున్న ప్రచారంలో నిజంలేదని పేర్కొన్నారు.