Killing Stone: జపాన్ లో బద్దలైన 'కిల్లింగ్ స్టోన్'... ముమ్మరంగా మూఢనమ్మకాల ప్రచారం

జపాన్ టెక్నాలజీ పరంగా ప్రపంచానికి మార్గదర్శి వంటి దేశం. అక్కడి ప్రజలు ఎంత విద్యావంతులైనప్పటికీ మూఢనమ్మకాల విషయంలో ఎవరికీ తీసిపోరు. ఇంతకీ విషయం ఏమిటంటే... జపాన్ లోని నాసు ప్రాంతంలో ఓ కిల్లింగ్ స్టోన్ ఎంతో ప్రాచుర్యం పొందింది. ఈ శిలలో ఓ దెయ్యం కాపురం ఉంటుందన్నది అక్కడి వారి నమ్మకం. ఈ మృత్యు శిలను అక్కడివారు సెషో-సెకి అని పేర్కొంటారు. 

అయితే, ఆదివారం నాడు ఆ కిల్లింగ్ స్టోన్ ముక్కలైంది. దాంతో స్థానికులు హడలిపోతున్నారు. ఆ పురాతన శిల ఇప్పుడు బద్దలవడం అరిష్టమని ప్రచారం జరుగుతోంది. 

జపాన్ పురాణాల ప్రకారం... సెషో-సెకి శిలను తాకినవాళ్లు చనిపోతారట. చూడడం కూడా నష్టదాయకం అని చెబుతుంటారు. ఆ శిలలో తొమ్మిది తోకల నక్క రూపంలో ఉండే పిశాచి నివసిస్తుంటుందని ఆ పురాణాల్లో పేర్కొన్నారు. ఆ మాయలమారి నక్క అందమైన 'తమామో నో మే' అనే సుందరాంగిలా మారి టోబా చక్రవర్తిని కడతేర్చేందుకు కుట్ర పన్నిందని, అయితే యుద్ధంలో తమామో ఓడిపోవడంతో ఆమె ఆత్మ మృత్యుశిలలో చిక్కుకుపోయిందని భావిస్తుంటారు. 

ఈ శిల నాసు ప్రాంతంలోని అగ్నిపర్వతాల నడుమ ఉంటుంది. 1957 నుంచి ఇది చారిత్రాక ప్రదేశంగా గుర్తింపు పొందింది.  అసలు, ఆ మృత్యు శిలను పగిలి ముక్కలైన స్థితిలో చూడడం కూడా అశుభమేనని ఓ జపాన్ నెటిజన్ అంటున్నాడు. కాగా, జపాన్ కు చెందిన యోమియురి షింబున్ అనే వెబ్ సైట్ మాత్రం వర్షం, ఉష్ణోగ్రతలు బాగా తగ్గిపోవడం కారణంగానే ఆ రాయి పగుళ్లు వచ్చి ముక్కలై ఉంటుందని పేర్కొంది.
.