Shane warne: నా గుండె బద్దలైంది: షేన్ వార్న్ మాజీ ప్రియురాలు, సినీ నటి ఎలిజబెత్ హర్లీ

ప్రఖ్యాత ఆస్ట్రేలియన్ స్పిన్ దిగ్గజం షేన్ వార్న్ మృతి అందరినీ తీవ్ర విషాదంలో ముంచేసింది. అందరూ ఆయనతో తమకున్న మధుర జ్ఞాపకాలను గుర్తు తెచ్చుకుంటున్నారు. షేన్ వార్న్ మరణం పట్ల ఆయన మాజీ ప్రియురాలు, బ్రిటీష్ మోడల్, సినీ నటి ఎలిజబెత్ హర్లీ తీవ్ర ఆవేదనను వ్యక్తం చేశారు. వార్న్ ను తనకు ఎంతో ఇష్టమైన వ్యక్తిగా ఆమె పేర్కొన్నారు. 2011 నుంచి 2013 వరకు వీరిద్దరూ సహజీవనం చేశారు. 

56 ఏళ్ల హర్లీ ఇన్స్టాగ్రామ్ ద్వారా స్పందిస్తూ.. "సూర్యుడు మరెప్పుడూ బయటకు రాకుండా మేఘాల చాటుకు వెళ్లిపోయాడనిపిస్తోంది. నేను ఎంతో ప్రేమించిన వ్యక్తి ఆత్మకు శాంతి కలగాలి. నాకు తెలిసిన వ్యక్తులలో అత్యున్నతమైన వ్యక్తి షేన్ వార్న్. ఆయన మరణంతో నా గుండె బద్దలయింది. ఆయన కుటుంబ సభ్యులకు నా ప్రేమను పంపుతున్నాను" అంటూ భావోద్వేగానికి గురయింది. ఎలిజబెత్ హర్లీ కుమారుడు డామియన్ కు తొమ్మిదేళ్ల వయసు ఉన్నప్పుడు ఆమెకు, వార్న్ దగ్గరయ్యారు. వీరి సంబంధంపై ప్రపంచ మీడియా అప్పట్లో అత్యంత ఆసక్తిని ప్రదర్శించింది.