Vijay Devarakonda: 'లైగర్'గా విరుచుకుపడిన విజయ్ దేవరకొండ.. ఫస్ట్ గ్లింప్స్ విడుదల

పూరి జగన్నాథ్ దర్శకత్వంలో విజయ్ దేవరకొండ హీరోగా 'లైగర్' సినిమా రూపొందుతోంది. పూరి .. చార్మీ .. కరణ్ జొహార్ కలిసి పాన్ ఇండియా స్థాయిలో ఈ సినిమాను నిర్మిస్తున్నారు. బాక్సింగ్ నేపథ్యంలో నడిచే కథ ఇది. ఈ సినిమాతో బాలీవుడ్ భామ అనన్య పాండే  తెలుగు తెరకి కథానాయికగా పరిచయమవుతోంది.

న్యూ ఇయర్ గిఫ్టుగా కొంతసేపటి క్రితం ఈ సినిమా నుంచి ఫస్టు గ్లింప్స్ ను రిలీజ్ చేశారు. ముంబైలోని ఒక మురికివాడకు చెందిన యువకుడు, చాయ్ వాలాగా తన జీవితాన్ని మొదలుపెట్టి ఒక బాక్సర్ గా ఎలా ఎదిగాడు? ఈ ప్రయాణంలో ఆయనకి ఎదురైన సవాళ్లు ఎలాంటివి? అనేదే ఈ సినిమా కథ అనే విషయం అర్థమవుతోంది.

ఫస్టు గ్లింప్స్ నే పూరి ఒక రేంజ్ లో అందించాడు. పూరి మార్క్ మాస్ సినిమాకి, విజయ్ దేవరకొండ మార్క్ యాక్షన్ తోడైతే ఎలా ఉంటుందనేది ఈ గ్లింప్స్ చెప్పేసింది. తెలుగుతో పాటు తమిళ .. మలయాళ .. కన్నడ .. హిందీ భాషలలో ఈ సినిమాను ఆగస్టు 25వ తేదీన విడుదల చేయనున్నారు.