Nagarjun: 'బంగార్రాజు' బరిలోకి దిగడం పక్కానేనట!

నాగార్జున హీరోగా 'బంగార్రాజు' సినిమా రూపొందుతోంది. తన సొంత బ్యానర్లో ఆయన ఈ సినిమాను నిర్మిస్తున్నారు. కల్యాణ్ కృష్ణ దర్శకత్వం వహిస్తున్న ఈ సినిమా, చకచకా షూటింగు జరుపుకుంటోంది. చైతూ - కృతి శెట్టి జంటగా నటిస్తున్న ఈ సినిమా, గ్రామీణ నేపథ్యంలో రూపొందుతోంది. షూటింగు మొదలుపెట్టిన దగ్గర నుంచి, చకచకా అప్ డేట్స్ వస్తున్నాయి.

దాంతో ఈ సినిమాను సంక్రాంతి బరిలో దింపనున్నట్టుగా వార్తలు వచ్చాయి. ఇక ఇప్పుడు సంక్రాంతి బరిలో నుంచి 'భీమ్లా నాయక్' తప్పుకోవడం ఖరారు కావడంతో, 'బంగార్రాజు' రాదనే అనుకున్నారు. కానీ జనవరి 15కి ఈ సినిమా రావడం పక్కానే అనే టాక్ ఇప్పుడు బలంగా వినిపిస్తోంది.

అన్నపూర్ణ బ్యానర్ లోని సినిమాలను రెగ్యులర్ గా తీసుకునే డిస్ట్రిబ్యూటర్లు, థియేటర్లను చూసుకుంటున్నట్టుగా చెప్పుకుంటున్నారు. ముందుగా ఈ సినిమాను ఓ మాదిరి థియేటర్లలో రిలీజ్ చేసి, అవసరమైతే పెంచుకోవచ్చనే ఆలోచనలో నాగార్జున ఉన్నారని అంటున్నారు. మొత్తానికి 'బంగార్రాజు' మాత్రం వెనక్కి తగ్గడం లేదనేది అసలు విషయం.