Nani: ఆ క్షణంలో నటించడం మరిచిపోయాను: నాని

ఇప్పుడు ప్రేక్షకుల దృష్టి 'శ్యామ్ సింగ రాయ్' పైనే ఉంది. 70వ దశకంలో కలకత్తా నేపథ్యంలో నడిచే కథ ఇది. నాని హీరోగా రాహుల్ సాంకృత్యన్ రూపొందించిన ఈ సినిమా, ఈ నెల 24వ తేదీన థియేటర్లకు రానుంది. ఈ నేపథ్యంలో నిన్న రాత్రి వరంగల్ లో ప్రీ రిలీజ్ ఈవెంట్ ను నిర్వహించారు. ఈ సందర్భంగా నాని మాట్లాడాడు.

"ఈ సినిమా కోసం రాహుల్ చాలా కష్టపడ్డాడు. టాప్ డైరెక్టర్ కాగల సత్తా ఆయనకి ఉందనే విషయాన్ని ఈ సినిమా చెబుతుంది. కృతి శెట్టి కొత్తగా వచ్చింది .. ఈ పాత్రను ఎలా చేస్తుందో అనుకున్నాను. తన పాత్రపై పూర్తి ఎఫర్ట్ పెట్టి అద్భుతంగా చేసింది. తనకి మంచి భవిష్యత్తు ఉంది.

ఇక ఈ సినిమాలో పల్లవి డాన్స్ చేస్తుంటే .. నేను జనంలో నుంచి చూస్తుండాలి. ఆమె డాన్స్ చూస్తూ నటించడం మరిచిపోయాను .. నటించవలసిన అవసరం రాలేదు. అంతగా ఆశ్చర్యపోయి చూస్తుండిపోయాను. పెద్ద సినిమాలకి దగ్గరలో మా సినిమా వస్తున్నా మాకు భయం లేదు. ఎందుకంటే ఈ కథపై మాకు ఉన్న నమ్మకం అలాంటిది" అని చెప్పుకొచ్చాడు.