Kalyanram: మళ్లీ సెట్స్ పైకి వెళ్లిన 'బింబిసార'

నిర్మాతగా.. హీరోగా కల్యాణ్ రామ్ ఇంతవరకూ సాంఘిక చిత్రాలను చేస్తూ వచ్చాడు. కానీ ఒక్కసారిగా ఆయన చారిత్రక కథాంశాన్ని ఎంచుకుని పెద్ద రిస్క్ చేశాడు. బింబిసారుడి జీవితచరిత్ర ఆధారంగా ఆయన 'బింబిసార' సినిమా చేస్తున్నాడు. ఈ సినిమా షూటింగ్ మొదలై 75 శాతం చిత్రీకరణ పూర్తిచేసుకున్న తరువాత టైటిల్ పోస్టర్ వదిలి, కల్యాణ్ రామ్ షాక్ ఇచ్చాడు. ఒకరకంగా ఇది కల్యాణ్ రామ్ చేస్తున్న సాహసంగానే చెప్పుకుంటున్నారు. ఏకధాటిగా కొనసాగిన ఈ సినిమా షూటింగుకు ఇటీవల బ్రేక్ ఇచ్చారు.

మళ్లీ ఇప్పుడు ఈ సినిమా సెట్స్ పైకి వెళ్లినట్టుగా చెబుతున్నారు. నెల రోజుల పాటు జరిపే చిత్రీకరణతో ఈ సినిమా షూటింగు పార్టు పూర్తవుతుందని అంటున్నారు. ఈ ఏడాదిలోనే ఈ సినిమాను విడుదల చేయాలనే ఆలోచనలో కల్యాణ్ రామ్ ఉన్నాడని చెబుతున్నారు. ఈ సినిమాతో కథానాయికగా సంయుక్త మీనన్ తెలుగు తెరకి పరిచయమవుతోంది. ఇక కేథరిన్ కూడా ఒక ముఖ్యమైన పాత్రలో అలరించనుంది. కొత్త దర్శకుడితో కల్యాణ్ రామ్ చేస్తున్న ఈ ప్రయోగం ఎంతవరకూ సక్సెస్ అవుతుందో చూడాలి.