Prabhas: 'సలార్' షూటింగ్ ప్రారంభం.. వైరల్ అవుతున్న ప్రభాస్, యశ్ ఫొటోలు

యంగ్ రెబల్ స్టార్ ప్రభాస్ నటిస్తున్న మరో భారీ బడ్జెట్ చిత్రం 'సలార్' షూటింగ్ ప్రారంభమైంది. ఈ ఉదయం ఈ చిత్రానికి సంబంధించి హైదరాబాదులో పూజా కార్యక్రమాన్ని అట్టహాసంగా నిర్వహించారు. సంచలన విజయాన్ని సాధించిన కన్నడ చిత్రం 'కేజీఎఫ్' డైరెక్టర్ ప్రశాంత్ నీల్ ఈ చిత్రానికి దర్శకత్వం వహిస్తున్నారు. మరోవైపు ఈ కార్యక్రమానికి 'కేజీఎఫ్' ఫేమ్ యశ్ ముఖ్య అతిథిగా విచ్చేశాడు. పూజా కార్యక్రమం అనంతరం ప్రభాస్, యశ్ ఇద్దరూ కలిసి ఫొటోలకు పోజులిచ్చారు. ఈ ఫొటోలు ప్రస్తుతం సోషల్ మీడియాలో వైరల్ అవుతున్నాయి.

'సలార్' చిత్రంలో ప్రభాస్ ఓ డిఫరెంట్ లుక్ లో కనిపించనున్నాడు. సలార్ అంటే ఒక సమర్థవంతమైన నాయకుడని... రాజుకి కుడి భుజంగా ఉంటూ ప్రజల సంరక్షణ కోసం పాటుపడే వ్యక్తి అని ప్రశాంత్ నీల్ ఓ సందర్భంలో చెప్పారు. ప్రస్తుతం ప్రభాస్ 'రాధేశ్యామ్' షూటింగ్ లో బిజీగా ఉన్నాడు. ప్రశాంత్ నీల్ కూడా 'కేజీఎఫ్ 2' సినిమాను విడుదల చేసేందుకు రెడీ అవుతున్నాడు.

మరోవైపు, తనకు ఈ సినిమాకు అవకాశం ఇచ్చినందుకు ప్రభాస్ కు ప్రశాంత్ నీల్ ధన్యవాదాలు తెలిపారు. ఈ కార్యక్రమం సందర్భంగా యశ్ ఇక్కడే ఉండటం సంతోషంగా ఉందని చెప్పారు.