RGV: 'పవర్ స్టార్' సినిమా నుంచి ఆసక్తికర పోస్టర్‌ ను విడుదల చేసిన రామ్‌ గోపాల్ వర్మ
- 'పవర్ స్టార్' పేరిట వర్మ సినిమా
- త్వరలోనే ఆర్జీవీ వరల్డ్‌ థియేటర్‌లో విడుదల
- 'జై పవర్ స్టార్' అని వర్మ కామెంట్
- ఎన్నికల ఫలితాల తర్వాతి కథ అని తెలిపిన ఆర్జీవీ
వివాదాస్పద దర్శకుడు రామ్‌ గోపాల్ వర్మ 'పవర్ స్టార్' పేరిట సినిమా తీస్తోన్న విషయం తెలిసిందే. ఇందులో పీకే, ఎమ్మెస్, ఎన్‌బీ, టీఎస్‌, ఓ రష్యన్ మహిళ, నలుగురు పిల్లలు, ఎనిమిది బర్రెలు, ఆర్జీవీ నటిస్తారంటూ ఇటీవలే ప్రకటించిన ఆయన ఈ సినిమాకు సంబంధించిన ఆసక్తికర పోస్టర్‌ను విడుదల చేశారు.
'పవర్ స్టార్ సినిమాలోని ఫస్ట్‌లుక్‌ పోస్టర్‌ ఇదిగో.. ఈ సినిమా త్వరలోనే ఆర్జీవీ వరల్డ్‌ థియేటర్‌లో విడుదల కానుంది. జై పవర్ స్టార్' అని ఆయన పోస్ట్ చేశారు. ఎన్నికల ఫలితాల తర్వాతి కథ అని ఆ పోస్టర్‌పై రాశారు. ఈ పోస్టర్‌లో పవర్ స్టార్ పాత్రధారి అచ్చం జనసేన అధినేత పవన్ కల్యాణ్‌లా పోజు ఇచ్చాడు. నలుపు రంగు టీషర్ట్‌ వేసుకుని కూర్చుని దీర్ఘంగా ఆలోచిస్తున్నాడు.
కాగా, తాను తీస్తోన్న పవర్ స్టార్ సినిమా ఏ వ్యక్తికో చెందిన బయోపిక్ కాదని వర్మ ఇప్పటికే ప్రకటించారు. పార్టీ ప్రారంభించి, ఎన్నికల్లో ఓడిన ఓ సినీ స్టార్‌కు ఎదురైన పరిణామాల గురించి కల్పిత కథతో ఈ సినిమా రూపుదిద్దుకుంటోందని వివరణ ఇచ్చారు. ఈ సినిమా కథ, పాత్రధారి ఏ వ్యక్తినయినా పోలి ఉంటే అది కేవలం యాదృచ్ఛికం మాత్రమేనని ప్రకటించారు.
