SarileruNeekevvaru: మధ్యలో మహేశ్ బాబు... అటు చిరంజీవి, ఇటు విజయశాంతి... హుషారుగా సరిలేరు నీకెవ్వరు ప్రీరిలీజ్ ఈవెంట్

హైదరాబాదులోని ఎల్బీ స్టేడియంలో సరిలేరు నీకెవ్వరు ప్రీరిలీజ్ ఈవెంట్ ఉత్సాహభరితంగా సాగుతోంది. హీరో మహేశ్ బాబు తో పాటు ముఖ్య అతిథి మెగాస్టార్ చిరంజీవి కూడా ఒకే వేదికపై కనిపించడంతో అభిమానుల ఆనందానికి హద్దుల్లేకుండా పోయింది. ఈ కార్యక్రమంలో మహేశ్ బాబు, చిరంజీవి ఒకే సోఫాలో కూర్చున్నారు. మహేశ్ బాబు మధ్యలో కూర్చోగా, అటు చిరంజీవి, ఇటు విజయశాంతి ఆసీనులయ్యారు. ఈ ప్రీరిలీజ్ ఈవెంట్ కు దర్శకుడు అనిల్ రావిపూడి, దిల్ రాజు, దేవిశ్రీప్రసాద్, ఆదిశేషగిరిరావు, సుధీర్ బాబు, రామజోగయ్యశాస్త్రి తదితరులు హాజరయ్యారు.

కాగా, ఎల్బీ స్టేడియంలోకి చిరంజీవి ఎంట్రీ ఇస్తున్న సమయంలో అభిమానుల హోరుతో పరిసరాలు దద్దరిల్లిపోయాయి. ఈ సందర్భంగా చిరంజీవికి మహేశ్ బాబు ఆత్మీయస్వాగతం పలికారు. ఇక అభిమానులు వేలాదిగా హాజరవడంతో ఎల్బీ స్టేడియంలో ఇసుకేస్తే రాలనంతగా జనసంద్రం కనిపిస్తోంది. ఈ సినిమా ఈవెంట్ మహేశ్ బాబుకు చెందినదైనా మెగాస్టార్ చిరంజీవిపై ప్రత్యేకంగా ఎ.వి ప్రదర్శించడం విశేషంగా చెప్పాలి.