: టాప్ పోస్ట్ నుంచి తప్పుకున్న లైంగిక వేధింపుల రాయుడు!
టీవీఎఫ్ (ద వైరల్ ఫీవర్) అనే వెబ్ మీడియా ఎంటర్ టైన్ మెంట్ సంస్థకు సీఈవోగా వ్యవహరిస్తున్న అరుణభ్ కుమార్ తన పదవి నుంచి తప్పుకున్నారు. ఓ మాజీ ఉద్యోగినిని లైంగికంగా వేధించుకుతిన్నట్టు అరుణభ్ ఆరోపణలు ఎదుర్కొంటున్నారు. టీవీఎఫ్ వ్యవస్థాపకుడు కూడా ఇతడే. తన కంటే సంస్థే ఉన్నతమైనదని భావించిన అరుణభ్ ఈ నిర్ణయం తీసుకున్నారు. ఇదే విషయాన్ని ట్విట్టర్ లో వెల్లడించారు. ఈయన స్థానంలో నూతన సీఈవోగా ధావల్ గుసైన్ బాధ్యతలు చేపడతారు.
ఓ మాజీ ఉద్యోగిని ఇచ్చిన ఫిర్యాదు మేరకు ముంబై పోలీసులు అరుణభ్ పై మార్చి 29వ తేదీనే పలు సెక్షన్ల కింద కేసులు నమోదు చేశారు. 2014-16 మధ్య కాలంలో టీవీఎఫ్ లో పనిచేసిన సమయంలో అరుణభ్ తనపై లైంగిక వేధింపులకు పాల్పడ్డారన్నది ఆమె ఆరోపణ. ఇక, ముంబైలోనే వెసోవా పోలీసు స్టేషన్ లోనూ అరుణభ్ పై ఇటువంటిదే మరొక కేసు కూడా ఉంది.
