: కాలువలో రద్దైన నోట్లు.. తీసుకోవడానికి పోటీపడ్డ స్థానికులు!
పెద్దనోట్లను రద్దు చేసిన తరువాత నల్లకుబేరులు తమ వద్ద ఉన్న రద్దైన నగదుని చెత్తకుండీల్లో, నదుల్లో పడేస్తోన్న సంగతి తెలిసిందే. ఉత్తరాఖండ్ లోని నైనిటాల్‌ జిల్లా హల్ద్ వానీ నగరంలో తాజాగా ఇళ్ల మధ్య ప్రవహిస్తున్న ఓ కాలువలో పాత 500, 1000 రూపాయల నోట్లు వెళుతూ కనిపించాయి. వాటిని గమనించిన స్థానికులు కాలువలోకి దిగి ఆ నోట్లను తీసుకోవడానికి పోటీపడ్డారు. కాలువలో చేపలు పడుతున్న మాదిరిగా నోట్లను పట్టుకున్నారు. ఈ విషయం అందరికీ తెలియడంతో కాసేపటికే స్థానికులు అక్కడకు భారీగా చేరుకున్నారు. ఈ సందర్భంగా అక్కడి పరిస్థితిని ఓ వ్య‌క్తి వీడియో తీసి సోషల్ మీడియాలో పోస్ట్‌ చేశాడు. ఈ విష‌యంపై స‌మాచారం అందుకున్న పోలీసులు అక్కడకు చేరుకొని స్థానికులు కాలువలోకి దిగకుండా చర్యలు తీసుకుని, ఈ ఘటనపై ద‌ర్యాప్తు ప్రారంభించారు.
