ap7am logo
Logo Bar bseindia nse-india msn yahoo youtube facebook google thehindu bbc ndtv v6 ABN NTv Tv9 etv namasthetelangaana sakshi andhrajyothy eenadu ap7am bhakti espncricinfo wikipedia twitter

కార్తీక పౌర్ణమిన జ్వాలాతోరణోత్సవ విశేషం

Sat, Nov 01, 2014, 11:24 AM
Related Image కార్తీకమాసం శివకేశవులకు ఎంతో ఇష్టమైన మాసం. ఈ మాసంలో వచ్చే పౌర్ణమి వాళ్లిద్దరికి మరింత ప్రీతికరమైనది. అందువలన ఈ రోజున ఒకవైపున విష్ణుమూర్తిని ... మరొకవైపున శివయ్యను పూజించడంలో భక్తులు తీరికలేకుండా ఉంటారు. అభిషేకాలు ... పూజలు ... ప్రత్యేక సేవలతో ఆలయాలు ఎంతో సందడిగా కనిపిస్తూ ఉంటాయి.

ఈ రోజున శివాలయాల్లో జరిపే సేవల్లో 'జ్వాలాతోరణోత్సవం' మరింత విశేషాన్ని సంతరించుకుని కనిపిస్తుంది. జ్వాలాతోరణోత్సవం ... త్రిపురాసుల సంహారంతో ముడిపడినదిగా చెప్పబడుతోంది. వరగర్వితులైన త్రిపురాసురులు తమ ఇష్టానుసారం ప్రవర్తిస్తూ సాధుసజ్జనులను అనేక విధాలుగా హింసించసాగారు.త్రిపురాసురుల ఆగడాలు తెలుసుకున్న పరమశివుడు, లోకకల్యాణం కోసం వాళ్లను సంహరించడానికి రంగంలోకి దిగుతాడు.

అలా ఆయన త్రిపురాసురులను సంహరించినది కార్తీక పౌర్ణమి రోజునే. అందుకే దీనిని 'త్రిపుర పౌర్ణమి'గా కూడా పిలుస్తుంటారు. సాధారణంగా ఏదైనా విజయాన్ని సాధించినవాళ్లు అనేకమంది దృష్టిని ఆకర్షిస్తుంటారు. అందువలన వాళ్లకి దిష్టి తగులుతుంటుంది. ఈ కారణంగానే వాళ్లు ఇంటికి తిరిగిరాగానే దిష్టి తీయడం జరుగుతూ ఉంటుంది.

అలా త్రిపురాసురులను సంహరించి విజయంతో తిరిగివచ్చిన పరమశివుడికి దిష్టి తగలకుండా ఉండటం కోసం పార్వతీదేవి జ్వాలాతోరణోత్సవం నిర్వహించిందట. అదే పద్ధతిలో ఈ రోజున శివాలయాల్లో జ్వాలాతోరణోత్సవాన్ని జరుపుతుంటారు. కార్తీక పౌర్ణమి రోజున శివాలయానికి వెళ్లి దీపారాధన చేసి ఈ జ్వాలా తోరణోత్సవాన్ని చూడటం వలన సమస్త దోషాలు నశించి సకల శుభాలు చేకూరతాయని చెప్పబడుతోంది.
X

Feedback Form

Your IP address: 50.16.107.222